Barbón diz que ye "imposible" cuantificar la repercusión n'Asturies del alcuerdu PSC-ERC

El presidente del Principáu visita la Feria Internacional de Muestres d'Asturies

El presidente del Principáu, Adrián Barbón, aseguró esti xueves que, pel momentu, ye imposible cuantificar qué efectos va tener nel financiamientu autonómicu l'alcuerdu algamáu ente'l PSC y ERC pa faer posible la investidura de Salvador Illa como presidente de Cataluña

"Anguaño, ensin que se cuantificara l'aportación del Estáu y sepamos cómo va ser el fondu de solidaridá ye imposible cuantificar nada", señaló'l xefe del Executivu asturianu dempués de que'l diputáu de Vox Javier Ortega Smith cifrara en 850 millones d'euros l'impactu que va tener n'Asturies el financiamientu singular alcordáu pa Cataluña.

Barbón fixo estes declaraciones na visita a la Feria Internacional de Muestres d'Asturies nunos momentos nos que taba celebrándose nel parlamentu catalán l'alderique d'investidura de Salvador Illa cola ausencia del ex-president Carles Pugdemont que, tres dirixise a los sos siguidores na redolada del Parlament, desapaeció.